Англияда NHS тизими “суперинсон” даражасида ишлайдиган янги сунъий интеллект воситасини синовдан ўтказмоқда.
Aire (AI-ECG risk estimation) деб номланган ушбу технология электрокардиограмма (ЭКГ) натижаларини таҳлил қилиб, беморларда касаллик ривожланиши ва эрта ўлим хавфини прогноз қилади. ЭКГ юракнинг электр фаолиятини қайд этувчи кенг тарқалган ва арзон текширув усули ҳисобланади.
Тизим шифокор кўзи билан аниқлаш қийин бўлган юрак тузилишидаги яширин ўзгаришларни ҳам топа олади ҳамда қўшимча текширув ёки даволашга муҳтож беморларни эрта босқичда белгилаб беради.
Дунёда илк бор Aire дастлаб Imperial College Healthcare NHS Trust ва Chelsea and Westminster Hospital NHS Foundation Trust клиникаларида синовдан ўтказилмоқда. Илк босқичда юзлаб беморлар жалб қилиниб, кейинчалик тадқиқот кўлами кенгайтирилади.
The Lancet Digital Health журналида чоп этилган тадқиқот натижаларига кўра:
• 10 йил ичида ўлим хавфини — 78% аниқликда
• келажакдаги юрак етишмовчилигини — 79%
• жиддий аритмияларни — 76%
• атеросклеротик юрак-қон томир касалликларини — 70% прогноз қилган.
Тадқиқотчилар Aire моделини 189 539 беморга тегишли 1,16 млн ЭКГ маълумотлари асосида ўқитган.
Мутахассислар таъкидлашича, Aire шифокорни алмаштириш учун эмас, балки инсон кўзи билан аниқлаб бўлмайдиган хавфларни прогноз қилиш орқали клиник қарор қабул қилишни янада кучайтириш учун яратилган.