2026-yil 10-sentabr kuni Abu Rayhon Beruniy nomidagi Urganch davlat universiteti Axborot-resurs markazida «Yangi Oʻzbekistonning Barqaror rivojlanish maqsadlari boʻyicha koʻrsatkichlari» mavzusida ilmiy-amaliy davra suhbati tashkil etildi.
Anjumanni Urganch davlat universiteti rektori, professor Feruza Madraximova kirish soʻzi bilan ochib, mazkur tadbirning milliy taraqqiyot va taʼlim tizimi integratsiyasidagi ahamiyatiga toʻxtaldi.
Davra suhbati doirasida milliy mustaqillik yutuqlari, mintaqaviy iqtisodiy siyosat va global Barqaror rivojlanish maqsadlarining oʻzaro aloqadorligiga bagʻishlangan quyidagi akademik maʼruzalar tinglandi:
· Sh.Yo. Allaberganov (Yoshlar masalalari va maʼnaviy-maʼrifiy ishlar boʻyicha birinchi prorektor) — «Oʻzbekistonda mustaqillik yillarida erishilgan muvaffaqiyatlar»;
· I. Abdullayev (Iqtisodiyot fakulteti dekani, professor) — «Mustaqillik yillarida samarali mintaqaviy iqtisodiy siyosat»;
· B. Ruzmetov (Barqaror rivojlanish markazi Xorazm viloyati boʻlinmasi rahbari, professor) — «Yettita milliy dasturda Barqaror rivojlanish maqsadlarining ifodasi».
Professor B. Ruzmetov oʻz maʼruzasida davlat rahbari tomonidan ilgari surilgan Yettita milliy dasturning ilmiy-nazariy va amaliy asoslarini, ularda Barqaror rivojlanish maqsadlarining qamrab olinishini tizimli ravishda tahlil qildi:
1. Bilim va malaka: Inson kapitalini mamlakat rivojlanishining bosh omili sifatida eʼtirof etib, bilim va koʻnikmalarni strategik resurslarga aylantirishni nazarda tutadi.
2. Sogʻlom va uzoq umr: Aholi salomatligini muhofaza qilish, umr koʻrish davomiyligi va turmush sifati koʻrsatkichlarini barqaror oshirish mexanizmini ifodalaydi.
3. Yuqori texnologiyali iqtisodiyot: Iqtisodiyotni yuqori mehnat unumdorligi, innovatsiyalar hamda yuqori qoʻshilgan qiymat yaratishga asoslangan tarkibiy modelga oʻtkazishni nazarda tutadi.
4. Suv va tabiat: Ekologik xavfsizlik va tabiiy resurslardan oqilona foydalanish konsepsiyasi orqali kelajak avlodlar uchun barqaror yashash muhitini taʼminlashni maqsad qiladi.
5. Adolat va qonun ustuvorligi: Sud-huquq tizimi mustaqilligi va qonun ustuvorligini taʼminlash orqali adolatli fuqarolik jamiyatini mustahkamlashga qaratilgan.
6. Kuchli mahalla: Mahalla institutini jamiyat taraqqiyoti va hududiy rivojlanishning asosiy tashabbuskori hamda buyurtmachisi sifatida belgilaydi.
7. Tinchlik, doʻstlik va Oʻzbekistonning xalqaro maydondagi oʻrni: Mamlakatning pragmatik, ochiq va bagʻrikeng tashqi siyosiy vakolatlarini kengaytirish hamda xalqaro maydondagi nufuzini yanada mustahkamlashni koʻzda tutadi.
Mazkur dasturiy yoʻnalishlar mamlakatda Barqaror rivojlanish maqsadlarini samarali amalga oshirish, ijtimoiy-iqtisodiy barqarorlikni taʼminlash va akademik sohaga kompleks yondashuvni joriy etishda muhim ahamiyat kasb etishi taʼkidlandi.
Ilmiy tadbir ishtirokchilar oʻrtasidagi munozaralar va ilmiy-amaliy savol-javoblar bilan yakunlandi.
B. Ruzmetov
Barqaror rivojlanish markazi —
Xorazm viloyati boʻlinmasi rahbari, professor