Yurtimiz ravnaqi va yoshlar kamoloti yoʻlida dual taʼlim hamda strategik hamkorlikning ahamiyati
Bugungi shiddatli globallashuv va iqlim oʻzgarishlari davrida barqaror rivojlanish maqsadlariga erishish global miqyosda eng ustuvor vazifalardan biriga aylandi. Oʻzbekiston Respublikasida intellektual salohiyatli, mustaqil va tahliliy fikrlaydigan, zamonaviy talablarga toʻliq javob beradigan mutaxassislarni tayyorlash tizimini yangi bosqichga koʻtarish talab etilmoqda. Bu borada oliy taʼlim muassasalari hamda nodavlat notijorat tashkilotlari (NNT) oʻrtasidagi oʻzaro manfaatli hamkorlik muhim poydevor boʻlib xizmat qiladi. Buning yorqin namunasi sifatida Diplomat University hamda «Barqaror rivojlanish markazi» NNT oʻrtasida imzolangan memorandum doirasida talabalar uchun tashkil etilgan malakaviy amaliyot dasturini koʻrsatish mumkin.
Xususan, 2026-yil 22-iyundan 17-iyulga qadar Diplomat University «Xalqaro munosabatlar» taʼlim yoʻnalishi 2-kurs talabalari «Barqaror rivojlanish markazi»da 20 kunlik intensiv malakaviy amaliyot oʻtadilar. Ushbu davr mobaynida talabalar BMTning «2030-yilgacha boʻlgan davrda barqaror rivojlanish sohasidagi Kun tartibi» global dasturi hamda uning doirasida qabul qilingan Oʻzbekiston Respublikasi Vazirlar Mahkamasining 2022-yil 21-fevraldagi 83-sonli «2030-yilgacha boʻlgan davrda barqaror rivojlanish sohasidagi milliy maqsad va vazifalarni amalga oshirishni jadallashtirish boʻyicha qoʻshimcha chora-tadbirlar toʻgʻrisida»gi qarorining mazmun-mohiyatini huquqiy hamda amaliy jihatdan chuqur oʻrgandilar. Shuningdek, ular BMT shafeʼligi ostida faoliyat yurituvchi nufuzli ilmiy-iqtisodiy tarmoq hisoblangan Barqaror rivojlanish yechimlari tarmogʻi (SDSN) faoliyati va Global barqaror rivojlanish hisoboti (SDR) reytingida davlatlarning tutgan oʻrnini baholash tizimini atroflicha tahlil qildilar.
Amaliyot davomida yosh tadqiqotchilar Rossiya Federatsiyasi hamda Markaziy Osiyo mamlakatlarida barqaror rivojlanish koʻrsatkichlarini oshirish yoʻlida faoliyat yuritayotgan davlat va nodavlat tashkilotlar, nufuzli universitetlar hamda ilmiy-tadqiqot markazlari faoliyatini oʻrgandilar. Ushbu hududlardagi tizimli muammo va kamchiliklarni aniqlab, ularning oʻziga xos yechimlarini tahlil qilish natijasida xorijiy davlatlarning ilgʻor tajribalaridan aynan Oʻzbekiston sharoitida qoʻllash mumkin boʻlgan samarali amaliy takliflar paketini shakllantirdilar. Talabalar bunday murakkab vazifalarni bajarish asnosida statistik maʼlumotlar, rasmiy manbalar va meʼyoriy-huquqiy hujjatlar bilan ishlash, zamonaviy kompyuter texnologiyalaridan samarali foydalanish, mutaxassislar jamoasida ishlash hamda qatʼiy mehnat intizomiga rioya qilish kabi amaliy koʻnikma va malakalarini sezilarli darajada mustahkamladilar.
Malakaviy amaliyot yakunida «Barqaror rivojlanish markazi» rahbariyati, boʻlim boshliqlari va talabalar ishtirokida tashkil etilgan «Yoshlar va barqaror rivojlanish» mavzusidagi ilmiy-amaliy davra suhbati oʻzaro fikr almashish va yangi gʻoyalarni oʻrtaga tashlash uchun qulay maydon boʻldi. Unda talabalar oʻzlariga biriktirilgan barqaror rivojlanish maqsadlari boʻyicha tayyorlagan tahliliy maʼlumotlari, xorijiy ekspertlarning xulosalari va oʻz takliflari aks etgan yakuniy taqdimotlarini namoyish etdilar. Markaz rahbariyati yosh mutaxassislarning tahliliy salohiyati va amaliy natijalarini yuqori baholadi. Mazkur uchrashuvda barqaror rivojlanish maqsadlari bugungi kunda yoshlar uchun ulkan ilmiy, ijtimoiy va professional imkoniyatlar eshigini ochib berayotgani, ularning dolzarb muammolar yechimiga ijodiy yondashishi jamiyat taraqqiyotini harakatlantiruvchi kuch ekani alohida qayd etildi.
Davra suhbati ishtirokchilari oliy taʼlim muassasasi va NNT oʻrtasidagi memorandum asosida tashkil etilayotgan bunday amaliy tadbirlar koʻlamini yanada kengaytirish lozimligini taʼkidladilar. Ayniqsa, talabalarning dars jarayonidagi nazariy bilimlarini bevosita ishchi muhitda amaliyot bilan uzviy bogʻlash maqsadida oliy taʼlim tizimida dual taʼlim (dual education) shaklini keng yoʻlga qoʻyish maqsadga muvofiqdir. Bunday tizimli hamkorlik talabalarni oʻz sohasining haqiqiy mutaxassislari va yetuk kadrlari boʻlib yetishishiga zamin hozirlaydi. Bu esa, oʻz navbatida, mamlakatimiz iqtisodiy-ijtimoiy ravnaqi va xalqaro maydondagi nufuzining yanada yuksalishiga xizmat qilishi shubhasizdir.